ორაგულის ღვეზელი ფენოვანი ცომით

ხახვი დავჭრათ ალყა-ალყა და საშუალო სიმხურვალეზე გაცხელებულ ზეთიან ტაფაზე მოვშუშოთ დაჭყლეტილ ნიორთან ერთად, სანამ არ დაკარამელიზირდება. შემდგომ გადმოვიტანოთ ხახვის მასა ცალკე და იმავე ტაფაში მოვშუშოთ ისპანახი სანამ არ დარბილდება.

დავუმატოთ მოშუშული ხახვი, ნაღები, მარილი, წითელი პილპილი, დაღერღილი წიწაკა და მოხალული დაღერღილი თხილი. ვშუშოთ სანამ მასა არ შეიწოვს ნაღებს. მოშუშვის შემდგომ უხეშად გავაკეპოთ ისპანახი და გავაგრილოთ.

ფენოვანი ცომი გავაბრტყელოთ და გამოვჭრათ სასურველი ფორმა. გულსართად ისპანახის მასა და ოკეანის ორაგულის ნაჭრები მოვათავსოთ, შევკრათ ფორმა და კვერცხში გათქვეფილი არაჟნის მასა გადავუსვათ. 180 გრადუსზე გაცხელებულ ღუმელში ვაცხოთ 25-30 წუთის განმავლობაში.